Home WHAT OTHERS SAYThe Sibal Family History Bambanense Blog Bambanense Officers San Diego Chapter Remember When Our Special Recipes Guestbook Kapampangan Poems The Unforgettable Characters of Bamban The Beloved Ghosts of Bamban Bamban Folk Tales Song Lyrics Bambanense Song Bamban Elementary School SongInyang Minunang Panaun FREE STUFF

Kapampangan Poems

Ing Balen Cung Bamban by Luz Dayrit Navarro Ing Salitang Kapampangan by Ernie Turla Imbitacion Keng Pamamoecia by Ernie Turla Para Queng Macalaut A Caluguran by Ernie Turla Ing Dalan Na Ning Bie by Ernie Turla Ing Bie by Ernie Turla Ing Canita Ampo'ing Ngeni by Ernie Turla Qng Aldo Mung Beitan Diciembre 18 by Gory Dary Ing Tauling Pamun (nang Rizal) by Mariano Proceso Pabalan Byron Igpa Mi (The Lord's Prayer in Kapampangan)

Luz Dayrit Navarro is a native of Bamban, Tarlac, Philippines. She studied at Holy Angel College (now, Holy Angel University) in Angeles City, where she was the Editor-in-Chief of the school organ, the Angelite. She also attended the University of Santo Tomas College of Pharmacy in Manila, Philippines. She married Dr. Honorio Navarro ( University of the Philippines Medicine '55) in May, 1953. They have four children, two boys and two girls. The family went to live in the US and they are all US citizens now.  All her children are married and live in different states with their own families. Now a widow, Mrs. Navarro resides in San Diego City, California. She is retired, and spends her time writing her autobiography, reading her beloved books and collecting her writings done when she was still in the Philippines. She also wrote the family history as it was handed down from previous generations by word of mouth. She wrote the family tree on her maternal side and encouraged her elder cousin to write the family history on her paternal side. She believes that any one who can remember the story of their lives must tell it to the succeeding generation and leave it as a legacy to future generations, that they may know how their ancestors lived during their time on earth. Ing Balen Cung Bamban by Luz Dayrit Navarro                       Siglong labing lima, lugal meguing Bamban,                       Ding bunduc Caraballo, banda lang albugan                       Ding tau canita, Baluga la't Zambal                       Mabibie caring bunduc at pulung macapal,                       Siglong labing-anam, ibat Capampangan,                       Taung mangatapang manintun pitamnanan,                       Quinurus lang ilug a ausan dang Parua,                       Capatagan iquit da, bistaman gubat pa.                       Miglinis la qng gubat, carelang pitucnangan,                       Dacal lang tanaman a ausan dang "bamban";                       Inia Bamban na rin ing pepalagyu ra                       Ba reng atandanan itang lugal a ita.                       E binang melambat, meracal la ring tao,                       Pati na magtindang Intsic a viajero                       Siglong labing-walo, dacal nong Cristiano,                       Meminyag Castila, frayleng Agustiano.                       Fundadores Bamban, Sibal ing lahi ra,                       Mialiwang familia, Bamban, memalen na,                       Rivera, Lugtu, Dayrit, Macale, Vergara,                       Manipon, Dela Cruz, Lumboy, Maristela;                       Punsalang, Sangalang, Campo, Santos, Megia,                       Navarro at Lagman, Manio at Tolosa,                       Tiglao, Lacanlale, Diaz, Dimalanta,                       Canlas, Pangan,Sison, Pamintuan, Arcilla.                       Gobernadorcillo, cayang cautusan,                       Guewa na neng balen, ing lugal a Bamban,                       Fecha mil ocho cientos treinta y siete ya                       Lubus meguing balen, ing Bamban canita.                       Revolucion '96 Bamban Katipunan abe la,                       Serviliano Aquino ya ing Heneral da.                       Siglong labing-siam iniang meyari ya,                       Meco lang Castila, Americano panyatang da.                       Siglong aduang-pulu, Bamban miunlad ya,                       Central Luzon Milling Company, ya ing telacad da;                       Dacal pupul atbu, pale, mialiwa pa,                       Ding Americano, progreso ing binye ra.                       Abe-abe la ngan dening taga-Bamban,                       Circulo Bambanense carelang aguman.                       Nula man miras, Sibal a familia                       Qng Sibal Reunion, maquipagtipun la.                       Caduang Guerra-Mundial, Hapon dinatang la,                       Apat banuang singcad, memalen pibata ra,                       Iniang Liberation, Americano mibalic la,                       Independencia ya ining pigcalub da.                       Fechang '91 ning siglong aduang-pulu                       Mitdas ya ing vulcan ausan dang Pinatubo                       Barrio da qng bunduc, minta lang memalen,                       Dios ya ing magligtas, e nala paburen.

ING SALITANG KAPAMPANGAN by Ernie Turla Dane caili, qng albugan / cabunducan ning Zambales, Bandang wanan, qng aslagan / Sierra Madre ning Bulacan, Qng mauli at paroba / ing cailugan at danuman, At queng arap, paralaya, / bunduc nang Mariang Sinucuan. Pilibutnan dacatamu / itang lahing Kapampangan Deng caparang Pilipinu, / ibat que lual menibatan Bagya-bagya racatamung / tatapus at lulusuban At nung mipaburen iti, / bandang tauli matda ta ngan. Anting prueba bandang norte / ating probinciang lalati Mepitna no reng sasabi / queng carelang tune lahi Magluid la reng dominanti / masusulmuc la reng ali Pota ing mal tang Pampanga / maguing anti ya careti. Ania ngeni cabang e pa / atrasadu ing panaun Sucat maintun tang paralan / aguantan ta-ing imigracion Pangilagan lang magporma / reng "enclaves" a paliguan da 'Nia nung ating bayung tuclas / Kapampangan ituru la. Deng quecatang cayanacan / ustung minta no Menila Cauli ra qng Pampanga / Tagalug no queng salita! Deti dapat lang imbernuan, / lalaco re paintungulan Ing amanu tamung sisuan, / Linabis la queng cabiasnan. Sucat sana umahan ta / ing e ustung patacaran Diquil queng pangaturu ra / reng anac queng Kapampangan, Bayu la sa manigaral / careng daiwan a salita Queng amanu ra que bale, / dapat la ngang mabiasa pa! Ania guiguisingan daco / panandam at pilubluban Gobernador, deputado, / at ninu mang manunculan: Dugo ining sabi tamu / sesen taya cabang-caba Uling careng Kapampangan / ya ing diwa at pagasa!

IMBITACION QUENG PAMAMOECIA By Ernie Turla Ana, abe, cuanan mu ne / ing pluma mu at cuadernu Dalan mula pati na yang / pamialungan mung salindru Maglacbe ca qng taldawa / maintun matimtiman a byu At cabud sinigpo-ing diwa / ibugnus mu-ing quecang agyu. Miayaliwa ing maliaring / mamanican queng isip mu Pilinan mu-itang macabie / inspiracion careng tau Itang bague macawili / babie sabic masqui quenu Pero abut ding amanung / macasimpan queng asbuc mu. E ca binang mamirapal / midyu panayan mung miral Ing mayumung taguimpan a / queng salu mu sasio lalual Ing paninap a masampat / dalise queng carangalan Ing cantang susulapo ning / casacdalan a panamdam Sadia mula reng rima mung / maluat mu nang pagmayapsang Pitsuran mung queng cang biga / maglawiwing maleparan Mataclayuran a puestu / neng durungdung ca queng yatu Ing mipacde mung caladua / matas pa queng pangatau Cabud tinaimic na at / melino ca panimanman Buclat mu ne yang cuadernung / manenayang quecang lamnan Gamitan mu-ing quecang beluan / careng amanu tang sisuan At itas me paintungulan / ing salitang Capampangan.

PARA QUENG MACALAUT A CALUGURAN by Ernie Turla Indat apipiunab cung / obat quen ca at queni cu, Micanlaut cata puestu / queng leparan na ning yatu, Cabud nia luncut ing pusu / mamagmalun a masolu At ing busilac a biga / maguing lulam ya queng lua cu. Ustung acaquit co queni / aldo-aldo reng aliwa Susuat na ning quening lub cu / nga cung sasabi, "Ot caya Maralas co pang acaquit / e co man balung bitasa, Samantalang ing mimiral / queng cacung lub ya ing ala! Map na mu pin ating "e-mail" / a quecata mamilatan Babie limbang queng nung ali / maluncut sa ing panamdam. Queti sulip alang mas mal / alang bague macapaldan Nune reng taung malugud / a ausan tang caluguran.

ING DALAN NA NING BIE by Ernie Turla Talaga yatang macanian / miquilala, micawani Micucurus gasgas queng bie / mipangabiayan saguli Caibat anga na qng anga / ni misan man e na cayu Misalubung, misagana / mipaniman pasibayu. Queng bie e ca macapilming / cabang-caba co miquiquit Uling datang ing panaun / ating muring lunto sabic Mamaglacbe queng marayu / at lacuan ne ing balen na Macalunus ya'ng melacuan / quebosnan yang cabarcada. Queng landas ning pamibie-bie / a quecatang tutuntunan, Miayaliwa no reng cacung / queyagape queng lacaran, Ating e na macaticdo / careng taung mangasacab Ating namang e cucurul / paquicuanan dang misadsad. Uling ing bie anti ya ping / pamisiglulu queng dalan Aguiang patag atin muring / bariculcul pangilagan, Ania itang mamulai / neng metung tamu pupuntan Mimingat tang masalese / lalon tamu'ng tatacbangan. Uling patia queng bilis mu / queng canal ca mipaidpid O nung caya careng batu / mibalisuag cang mitaquid Conpormi mu nung miticdo / capa queng pangabagsac mu Pero reng ngang cayagnan mu / muna no ngang siguradu. Ania ing panabilin da / macacalale ta sana Aguiang e tana mabilis / e ta mu sa mitotomba Banting upayang dasan ta / ing quecatang pupuntalan Itang lugal a masaya / nung nu carin ing taguimpan.

ING BIE by Ernie Turla Ing sabi ra reng mangatua / ing bie anti yang rueda Ananang atyu ca babo / ananang macalalam ca Pero nung balu mung talnan / ing quecang bie, caluguran Cabud miyuquiat ca babo / agad mu neng patucnangan. Sabi ra pa reng aliwa / nung talagang mate naca Masqui nu ca carin canu / bastat maintun dalan ita Acu namang mamaquibat / anta nanung palague yu Pialungan tamu mu waring / lelangan ning Apung Guinu? Mirinan tang caisipan / queng Guinung Dios a miglalang Mirinan tang catimawan / ban mamili queng nanu man Ania e ta bisu-bisu / ing ustu yang tutuparan Bancanita e ta mique / queng matsurang capalaran. Ita mismu ing gagawa / queng quecatang bili queng bie Gagamitan taya'ng isip: / maglibutad, o maglele, Sumulung, tucnang o matras / mangilag o mamagsiga Libri tamu queng nanu man / e ta mu anting manica!

ING CANITA AMPO'ING NGENI by Ernie Turla Iniang cayayanacan cu / iti e cu pa quelinguan Deng magaral qng escuela / pawa la ngan queng cabiasnan E la anti mo sa ngening / Ing Inglis da reng magaral Barabaricual queng mali / melabias la queng pirapal. Uling alang calculador / deng estudiante canita Metung lang tren mememoria / at matinic la queng cuenta Stone-Winkel Arithmetic / isy-isy ya carela Ing pamag-"times" siapilitan / yang memoria ban mabiasa. Pamamasa careng libru / agus la queng catalustus Metayas la queng tenacan / careng Osias Readers alus Aquit mula queng cuartu ra / gagawan da ing "homework" da E la bisang mitauli queng / tuturu ra reng mestra ra. At aguiang queng pamanyulat / "composition" as no galing Daig do pa reng macudta / sumulat la atmu santing Licas de pa queng "fountain pen" / queng cuadernung Senorita Ing "rough draft" ning sinulat da / careng Mongol a lapis da Deng capital sanac do ngan / Batanes anga qng Sulu Pati nareng careng nacion / a aliwang macarayu Cabusadu re historia / ing labuad tang pacamalan At balu rong igale reng / poecia rang pagaralan. Canitang panaun aita / 'guiang capitu ya mung gradu Anti neng tarat queng Inglis / saguid ya queng pangalutu Macapagmulalang sabian / e ya pa man mig-graduadu Alucacan da neng ausan / para turung anting mestru. " Oyan ing quetang maluat na / bamung balung picompara Macarine lang masiadu / deng ebun a quecang marca Ot balamu ala catang / ababalu aguiang ditac Magagastus cu mu ata / neng pane cang mibabagsac." E cu balu pota galang / darala na ning panaun Uling acaquit cu'ing ngeni / marayu queng quetang napun Canita ustung metigtig / ya'ing cumpana neng orasyun Pasi-uli no reng que lual / at queng bale no mandatun. Sisimba que neng Domingo / at mangadi queng Miniaclung Ing misa ming tatagunan / Latin ya pa macatuntun; Aquit mula reng babai / pacabelu la ngan lupa Durucu que neng magsantus; / at tatacut micasala Ustung mag-"flag ceremony" / tutucnang do reng calesa At deng gamat da ring malda / cacabit do que salu ra Careng mestra mi at mestru / mag-"good morning" que aldol-do Tatas mila reng gamat mi / at mag-"recite" macaticdo Ngeni iti mewala na / bihira na mung masiadu Mi-alilan ata'ing sabla / ultimu na mu reng tau Biruan mung deng cayanacan / a lalaquing acaquit cu " Beatles" ing buac da qng caba / uling yayti canu'ing usu. Paca-"jeans" la reng babai / pacatinga lang lalaqui Deng aliwa quen yang arung / pa ing tinga ra neng cai Paca-"tatoo" la qng arap / pati babai na ngeni Mipamate la pa queng "drugs" / at mi-usu'ing "aids" careti. Ibalic cu quetang napun / 'niang ing bie cu abac pamu Iniang saguiwa pa'ing angin / at ing "smog" e mi balu Quetang "peace time" a ausan da / alang guera't basag-ulu Cataimican ing mimiral / e la balisa reng tau Usu canita'ing harana / mamanican queng babai Alang lulual maquipag-"date" / lalbe cine anti ngeni Uling ing pangilagan dang / miamasamas lubus deti Ya'ing indredus queng pamilia / a macapatda queng puri Camarinayan canita / ing masisirang dalaga Deng babai pagsicapan / dang e dinat a sampaga Busilac dang carangalan / masusucad queng linis da Nung aniapin cabalitan / maleparan ing hinhin da At ustung queng La Mallorca / nung sicsican at mascup na Nung ating pacatalacad / a babai o mangatua Yang lalaqui talacad ya / at yampang ne'ing luclucan na Pagcusan nang daptan iti / aguiang e no caquilala. Nung misaque no man queng "jeep" / deng aduang miquiquilala Misiglulu la pa reti / mipamayad pasai ra At deng misisiping bale / mipamie la queng lutu ra Masese ing relacion da / at mipapagmasaquit la. " Mengalabas na'ing panaun / baintau naca ngeni Obat dugu mecanian ca / pasari na ning nanu'iti Queng pangatalabu mu / queng high school e ca meyari Ing buri cu pamo sana / magdoctor ca o magpari! " Migpalat ca e ca lulub / queng clasi mu qng escuela Maqui-tetsing camu canu / 'nia pala e ca mebiasa! Iti dela mung queragul / ing sugal at cigarilyu Pane nacang quetang cantu / ari raca reng lasenggu. " E cu balu nung caninu / ca migmana o memuli Cabang deng ngang daya tamu / mangayap la pa at sugui Nung ania pin sisisian cu / ot licuan taya pa'ing baryu Alang linto caunlaran / queng pamaglipat ta Tondu! " Ngeni neng butacal naca / masaquit da nacang yusuc Queng masanting e ra na ca / atuntun at abaluctut Apamasla anting pila / mesias ne ing quecang buntuc Nung ebun ca mung linaga / cayarle mo retang buguc" Ating asan a bilasa / ating camuting absican, Ating danum a matabsing / lasun a payung-payungan Ating lawing taranati / masalpac a camatsilis Nung 'nia aguiang careng tau / ating lalto a e sunis! Maldang talapaquiramdam / mamun na cu pa quecayu Icua cu na ring apasiag / ing durucal quening lub cu Mausta cung panalangin / matras sana ing panaun Ban layun deng cayanacan / mag-anti la careng napun.

Qng Aldo Mung Beitan Diciembre 18 by Gory Dary (Talipanpan neng Gng. Gregorio C. Dayrit) Ua baluan mu qng minuna, pilcaran mu neng patanid, Ing mebigu mung Poetang migale qng "Ecu Malit." Dapot nung deang bulaclac ilang cacu misisitsit Qng aldo mung quebaitan, macananung ecu dalit? Sisitsit da man canacu, picamuan, sana emula, Uling era naman balu, sinabi ramu karela, Deang maralas daralo, munta queni, munta queta A balisang limpad, limpad, masalitang mariposa. Tabalu ding mariposa ba't carelang camalayan? Ing malijim nang panaslag ning aldo mung quebaitan? Dapot, canitang sabi ra, carela mu namang dimdam, Caring malagu nang Hadas ning lebasan dang caqueuan. At ding Hadas quitnan cula, tajimic la't e bubulad, Nune, ing cacu ra tiru, ing bunduc ning "Nabanlag." Memintu cu't pintalan que, at layun cu pang minuquiat, Uling ing canacung nasa magcang carin cu amalas. Nanuman, ala cung disan pangaras cu cababauan, Balacu, miras na cacu, wakas ning sablang lelangan, Dapot cabud meliquid cu qng planas banda cung wanan, iquit que ing larawan mu, lalauan nacu't titimanan! Guinalang que't delanginan, dapot biglang merine cu, Uling ala cu mang bitbit para qng beitan mung aldo. Dapot ngening balu muna qng yamu ing caguiuan cu, Damutan me't daraun que ing "pusu" ning calulu. ___________ The English Translation USTANG Translated by Luz D. Navarro Yes, I remember that you gave a reply To your forsaken Poet who sang "I Knew Not." But if those flowers themselves whisper to me The day of your birth, how could I not sing it? Though they whisper to me, reprove them not, They are innocent, it was whispered to them By their frequent visitors who flit here and there, Those busy fluttering, gossiping butterflies. I know not how those butterflies ever knew The mysterious dawn of your birth! But they also told me that they only heard it From the beautiful Naiads they passed in the wilderness. When I asked the Naiads, they were silent And pointed to me the mountain of Nabanlag. So, off I went and climbed the mount That I might see what I have hoped for. But when I reached the top, there was nothing. I thought it was the end of everything--- But when I turned to look at my right side--- There, smiling at me, was the image of you! I gave obeisance, but suddenly, I was embarrassed, For I brought no offering on this day of your birth, But now that you know how deeply I feel, Please accept my sole offering--- my poor heart. About the poem: The original Pampango poem was written by the poet, Gory Dary in December 1925 and published in the Lirang Capampangan, a magazine circulated in provinces of Pampanga and Tarlac. At that time, the writer was courting the young lady, Ustang (Fausta M. Sibal) whom he later married in 1927. When the family of Ustang read the poem "Ecu Malit," the lawyer brother of Ustang made a poem supposedly written by her entitled "Malit Mu na" and also published it in the Lirang Capampangan. In "Ecu Malit," the poet was asking what the smiles and meaningful glances of Ustang meant. In "Malit Mu Na," Ustang hinted that her glances were meant to measure or size up her suitor if the suitor will pass her strict scrutiny. This surviving Pampango poem was found among the personal papers and documents of the late Fausta S. Dayrit upon her demise in 1988. It is now in the keeping of Ustang's son, Eduardo, who supplied us a copy. Note: -Hadas are river and stream nymphs. -Nabanlag was not actually a mountain, but just a low hill. In the 1920's, it was one of the favorite picnic spots of the young people of Bamban.

ING TAULING PAMUN (nang Rizal) by Mariano Proceso Pabalan Byron Mamun cu balayan a cacung sasamban, Labuad nang inirug ning aldo masilang Mutya ning alayang cadayatmalatan Carinan ning sampat a mipda queque ngan. Queca yayain cu qng minlungang tula Ining canacung bie a lanta't malugma Aguiang maslag pa man o masamyu man sa, Queca ibie cu rin, ba ca mung mipala. Diling taguimpan cu iniang cayanacan At iniang dagul na't ganap na qng sican Ing aquit daca sang alang musing dit'man Maulang iyas ning Malat qng Aslagan. Atangalan cu sa, ing misan ayaldo Mayampat tutulu ing lua ring mata mu At layun miatna ing mal a canuan mu, Alang dine't canglap aguiang man sang nanu. Taguimpan na ning bie, tali ning inawa Qng pangabili mu mipala ca sana, Mipala ca sana nga ning guguliac na Nining malapit cung lumipo caladua. O casampat na nung wari't mibulang cu Ica mibangun ca, sintang balayan cu, Nung ing camatayan ya ing icabie mu, Casampat ning mate lalam ning banua mu. Panalangin mula ding ingsil a palad A magcacasaquit ampon meyagapas, Din yawis a indung miculapu't sindac A mitangis-tangis qng calma ming linsad. Panalangin mo ring ulilang calulu, Ding magsasariling yawis a mebalut, Detang pacasucul, at panalangin mu Ing cawawacasan a catimawan mu. At ngening calaput ing dulum ning bengi At qng picutcutan dit'man alang inge Ding carin malacuan bucud mung ding mete E mu lilinlangan ing lihim a iti. Nung macaramdam cang banayad a tigtig At malumbe basle babague qng aclis Acu, balayan cu, acung paunliguid Ing catimawan mu canacung daralit. Mistula mu queca ing calinguan mucu, Uling maynan cu ngan ing cacarinan mu At ing mabilug a caliwalasan mu Parating manamdam quening siwala cu. Banglu, sala, cule, aclis, cagalayan Yang munie queng quecang capigaganacan Ampon ing miyulit-ulit a'lang pitayan Qng cacung dalise casalpantayanan. Irug cung balayan, pun ning sablang saquit; Sintang Pilipinas, ustan mung pagsulit: Quecayu ing sabla, lacuan cu ngan tiquis; Sinta cu't pengari queca co panalig. Maglacbe cu carin, mung nu alang tarus Alang alipan at lilung a berdugos, Ing panialpantaya nung nu alang tacut At nung nu yang diling diling mumutus ing Dios. Lacuan dana cayu, pengari't capatad A cabangal na ning caladua cung ingat, Queca caluguran cung meliling labuad, Pasalamat cayu qng cacu merapat. Mamun cu, babaing e cu cabalayan, A canacung sinta ampon caligayan, Mamun cu quecayu, bie cu at palsintan, O, ing camatayan ya ing capainawan. (Declaimed by Efren Reyes in an oratorical contest at Valdez Elementary School in Floridablanca, Pampanga during the 60s.)

IGPA MI (The Lord's Prayer in Kapampangan) Igpa mi Ati ka Banua Pasamba me ing lagiu mu Datang kekami ing panga'ari mu Papamintu mu ing lub mu Keti sulip anti banua Ing kakanan mi king aldo'ldo Ibie mu king aldo ngeni Ampo ning pamatauad mi karing mikautang kekami Emuke paisaul king tuksu Nune ikabus mi king sablang marok yanasa.

Back to Top